`సైరా`కి చిరు బ్లాక్‌బ‌స్ట‌ర్ సెంటిమెంట్
మెగాస్టార్ చిరంజీవి కెరీర్‌లోనే భారీ బడ్జెట్‌తో తెర‌కెక్కిన చిత్రం `సైరా న‌ర‌సింహారెడ్డి`. సురేంద‌ర్ రెడ్డి ద‌ర్శ‌క‌త్వంలో మెగాప‌వ‌ర్ స్టార్ రామ్ చ‌ర‌ణ్ ఎంతో ప్రతిష్ఠాత్మ‌కంగా నిర్మించిన ఈ సినిమాలో న‌య‌న‌తార, త‌మ‌న్నా హీరోయిన్లుగా న‌టించ‌గా… అమితాబ్ బ‌చ్చ‌న్‌, జ‌గ‌ప‌తి బాబు, సుదీప్‌, విజ‌య్ సేతుప‌తి ఇత‌ర ముఖ్య పాత్ర‌ల్లో క‌నిపించ‌నున్నారు. అమిత్ త్రివేది సంగీత‌మందించిన ఈ సినిమా… ఇటీవ‌లే చిత్రీక‌ర‌ణ పూర్తిచేసుకుంది. ప్ర‌స్తుతం నిర్మాణానంత‌ర కార్య‌క్ర‌మాలు జ‌రుపుకుంటున్న ఈ సినిమాని గాంధీ జ‌యంతి సంద‌ర్భంగా అక్టోబ‌ర్ 2న విడుద‌ల చేయ‌బోతున్నారు. ఆస‌క్తిక‌ర‌మైన విష‌య‌మేమిటంటే… స‌రిగ్గా 33 ఏళ్ళ క్రితం అంటే 1986లో చిరు క‌థానాయ‌కుడిగా న‌టించిన `రాక్ష‌సుడు` చిత్రం కూడా ఇదే అక్టోబ‌ర్ 2న విడుద‌లై ఘ‌న‌విజ‌యం సాధించింది. మ‌రి… ఆ సెంటిమెంట్ మ‌రోసారి వ‌ర్క‌వుట్ అయి… `సైరా` కూడా చిరు కెరీర్‌లో మెమ‌ర‌బుల్ ఫిల్మ్ అవుతుందేమో చూడాలి.
